January 22, 2026 (Ningani) zan dar 7:00 khan MIPOTY EC meeting chu MAL Office, Vanapa Hall hnuaiah neih a ni a, committee member 11 an tel. He meeting-ah hian thu pawimawh tak tak rel niin chung zingah chuan MIPOTY kum 10 tlinna, Tin Anniversary lawm dan tur hrang hrang a tel.
Tin Anniversary lawm dan tur hrang hrang chu hetiang hian duan a ni:
- February 20, 2026-, MIPOTY Foundation Day-ah hian Tin Anniversary kickoff-na chu Prof. RL Thanmawia, founder president neih tura rel a ni a, poetry dah khawmna e-book leh anniversary logo tlangzarh nghal a ni ang. Hemi zanah hian college hrang hrang literature club-te sawmin poetry evening neih tura ruahmanna siam a ni bawk. Tin Anniversary pualin logo insiamsiak hi pawl chhungah huaihawt a ni dawn a, lawmmanah Rs. 1000 siam a ni bawk.
- March 21, 23026-a World Poetry Day lo thleng tur hi Tin Anniversary lawmna kal zel atana hman tur a ni a, hemi ni-ah hian chanchinbu hrang hranga thuziak tihchhuah te, AIR leh cable TV-ah te programme hman te tum a ni bawk. Tin, World Poetry Day lawmna hi Govt. Hrangbana College Literature Club te nena ṭangkawpa hman tura duan a ni.
- Zirlaite pualin Poetry Writing Competition neih rawt a ni a, sikul pathum thlang chhuakin a hmun ngeia kal chilha on the spot-a poetry inziahsiak huaihawt tum a ni a. He thil tihhlawhtlin hna hi Tin Anniversary Celebration Sub-Committee leh Office Bearers kutah dah a ni.
- Tin Anniversary lawmna pui ber leh kharna hi kum tawp lam, October 19-23 inkar hun remchanga hman tura rawt a ni a, ruai nena ropui taka hman tum a ni. He ni hi Poetry Festival anga kalpui nghal tur niin, Poetry Reading Competition neih nghal te, Zaikungthar Vol. 8 tlangzarh leh MIPOTY Book Award hlan tura ruahmanna siam a ni.
Meeting-ah hian Zaikungthar Vol. 8 editorial board tur te, MIPOTY Book Award buaipuitu turte siam fel nghal a ni a. Hei bakah hian MIPOTY constitution leh member list-te a bua siam tura thu rel a ni bawk.
Post a Comment